恒生噚日派成績表，個記者會變咗副董事長柯清輝個人Show，一時廣東話，一時「煲冬瓜」，鬼咁風騷；其餘四位高層梁永祥、潘仲賢、陳國威及薛關燕萍（圖），全程做布景板，只有同樣由滙豐借調到恒生、由前線退居後防做營運總監嘅薛太，有幸被傳媒點名問問題，先有機會開金口，其餘三位都係得個坐字。
今次係柯大俠調任恒生之後，第一次派成績表（唔計中期業績），粒幾鐘得佢不停講嘢，結果狂飲咗四大杯水，仲講到聲都咳，高層真係唔易做。
雖則咳到面紅紅，但講到恒生近年高層人事變動多多，佢就好抵死咁講咗句有「合」無「摩」（即係話大家合作愉快，無任何摩擦）！
柯大俠同一眾台上男高層，以至喺台下撐場嘅男員工，都齊齊帶住恒生紅噹噹嘅公司呔到場，以示上下一心，之但係華華唔明點解冇預女職員嗰份嘅呢？