嘉里起緊嘅九龍灣超巨商場MegaBox，其中約三萬呎租咗畀UA院線，零七年落成之後，嗰度就會有UAMegaBox，八間影院總共超過一千個座位，頂級數碼音響系統，營造環迴立體聲效果，座位以高身靠背設計，手柄重有位放杯，照顧周到。
呢個百一萬呎嘅巨無霸商場，同一般本地場唔同，已租出咗一半，底租十至三十蚊呎，另設營業額提成，邊樣高計邊樣。
呢個場最大租戶係英國最大美化家居用品零售集團百安居，準備一擲兩億開香港首間十二萬呎旗艦店，嘉里話今個月重會同另外兩間澳洲嘅同類型公司傾租，呢個係佢哋在港頭炮，東九龍又有強敵林立，一定要搵多啲新鮮租客至吸引到人流。