超人檔TOM仔換完CEO之後無咩動靜，當大家（包括新CEO湯美娟）諗住靜待21號業績發布會嘅來臨，噚日失驚無神畀《頭條》爆佢哋退出唔玩《亞洲周刊》，當年大拿拿用5000萬買50%股權點收番成本呢？方法之一係換明報企業股份，總之TOM仔淨係想快啲甩身云云！唔使問，明仔同TOM仔兩邊都冇嘢講，TOM仔個靚太公關只係話唔評論傳聞，總之呢一刻仲持有50%股權，仲係好尊重編輯自主咁啦！
其實，由TOM仔2000年買50%權益到𠵱家，耐唔中都會傳佢哋唔玩，最大原因係一直虧本，真係超人都難救！本嘢本身又做成點？坦白講，雖有參考價值，但唔會有衝動畀錢買嗰隻囉；更大問題係，你未必喺書報攤搵到㖭！