憑電影《傲慢與偏見》（Pride&Prejudice）角逐奧斯卡影后的二十歲女星姬拉麗莉雖然鎩羽而歸，但就以一襲VeraWang酒紅色單肩晚裝得到美國名人雜誌《People》和香港時裝設計師鄧達智的認同，被選為今季奧斯卡最佳衣着人選。《People》大讚姬拉麗莉穿出性感曲線，但毫不過火；鄧達智則認為今年女星多穿淺色eveninggown，如米白和淺金等，姬拉麗莉的酒紅色晚裝對比下，立時脫穎而出，加上姬拉氣質出眾，故此成為「Thebest」。相反，今次出席奧斯卡穿上黑白裙戰衣的章子怡，鄧達智認為「老咗二十年」，相形失色。採訪：林妙萍
最佳衣着
No.1–姬拉麗莉 酒紅夠奪目
（KeiraKnightley）
鄧達智評：「酒紅色個color無論單睇，定成個場嚟睇，都比較特別，沉色中夠活，一望就跳出。單肩同幾何款嘅設計，Glam得嚟唔俗氣，古董頸鏈配埋佢嘅氣質，真係無話可說，係No.1！」
No.2–珍妮花洛庇絲 草綠襯膚色
（JenniferLopez）
「J.Lo平時着衫好loud，難得今次佢揀得咁好，佢着綠色係bestchoice，因為佢係拉丁人，膚色較深，同啲金髮鬼妹爭着米白、肉色好蝕底，反而綠色顯得她更加fresh，更加靚。」
No.3–查理絲泰朗 花蝴蝶破繭
（CharlizeTheron）
「CharlizeTheron衣着同品味向來幾有保證，今次嘅Diorgown都係goodpick啦，肩膊位大蝴蝶最靚，夠特別，下身重叠得有線條，成個款都好靚。」
No.4–娜奧美屈絲 飄逸似仙子
（NaomiWatts）
「nudecolor係今季大熱色，同NaomiWatts嘅膚色好夾，條裙由多層薄紗組成，夠飄逸，整體望落有啲仙子feel。」
No.5–米雪威廉絲 搶鏡魚美人
（MichelleWilliams）
「最要讚係魚尾裙腳位拖得好靚、好自然，顏色夠sharp，整體線條同美感都恰到好處。我個人覺得荷葉邊大幅咗少少，不過影響唔大，一樣OK。」
影后要換衫！
「Reese太乖女喇，佢着出嚟好似鄰家女孩咁，只係proper，唔夠outstanding，同埋呢類蛋糕裙已經唔興，着起唔夠fashionable又老氣，加上佢唔高大，更加平凡。佢做Oscar影后，應該轉着JessicaAlba嗰條裙，肩帶幼啲、長拖尾，係最典型嘅鬼婆晚裝，唔特別，不過靚。」
最差衣着
No.1–章子怡 黑襯白失策
「上次（金球獎）佢着青綠色雪紡Armani着得極好，今次就失色好多，章子怡揀錯咗黑白色，即刻老咗二十年，所以唔起眼之餘，仲好老。章子怡係近乎唯一嘅華人女星，顏色應該大膽啲，我會suggest佢着翡翠綠，因為jade代表中國文化，更接近同突出到佢嘅身份。」
No.2–珍妮花雅麗絲頓 未瞓醒出街
（JenniferAniston）
「成個人嘅風采冇晒，條黑裙，U領吊帶配魚尾，太普通，沉色又唔起眼。全個look頭髮最曳，好似未吹完、瞓醒就行出街咁，令人失望。」
No.3–羅倫赫特 騎呢波波褲
（LaurenHutton）
「Model出身嘅LaurenHutton以往着衫冇乜大錯，今次就好差，上身tuxedojacket合格，但下身嗰條四個骨窄褲好差，仲有褲腳嘅毛波波，完全唔啱場合，downdress得好緊要，仲有個頭好似一堆亂草咁，都要改。」
No.4–艾美雅當絲 啡色難討好
（AmyAdams）
「條裙本來冇大問題，不過咖啡色係好蝦人着，唔適宜喺redcarpet場合揀呢類色，唔係smartchoice。」
