滙控（005）收市後派成績，盈利係一般預測嘅上位數，第4季股息0.31美元（2.42港元）多過上次15%。英國開市反應良好，滙控C輪又會熱炒一番。
滙控股息相等於股價1.8%，炒短期滙控C輪，睇溢價時要計埋呢個因素。落場搵銀，揀屆滿期稍遠者較着數，例如9607（5月尾到期）、2228（7月初到期）、2176（9月初到期）。滙控C輪幾乎肯定今朝隻隻裂口開出，短期而槓桿率大者，升幅會好勁，高價撲落去要先諗諗風險。
恒指C輪2209：唔想高追滙控C輪者，可以買大市，即係吼恒指C輪。滙控今朝有機會高開1.50-2.00元，本身會帶動恒指向上62點，連埋其他成份股上升，估計恒指今日早段會上升130點。喺乜嘢位入市買恒指C輪，臨場執生。
揀對象，2209有得諗，6月尾夠鐘，輪價23.5仙，溢價2.1%，槓桿率16.8倍（有效10.7倍），引伸波幅19.6%。
建行C輪2104：建行（939）跌5仙，C輪2104又係跌5仙，跟到貼，值得博反彈。隻輪6月初夠鐘，輪價90仙，零溢價，槓桿率4.1倍（唔使理有效槓桿率）。2107與9978，條件相若，2104槓桿率則稍大。有幾隻8月以後到期嘅，溢價10-28%，咪多手。
章盛