民建聯主席馬力話有人挑撥佢哋與曾特首嘅關係，其實民建聯與特區政府關係良好。
邊位仁兄仁姐咁大膽，居然搞挑撥離間？似乎係仁兄多啲噃，姓名呼之欲出㖭，於是打電話畀呢位usualsuspect（涉嫌人士），開門見山，直插心臟地帶：「你係唔係馬力口中嗰位挑撥人士，快啲認！」呢位仁兄素來聲大大，立即回應一句：「我挑——撥先至奇，有人擺我上枱，搵下台階至真。」騎騎，諗深一層，學陶傑專論（三月三日）話齋，中國人好懷疑，鍾意質疑別人動機，常常因人廢言、唔使講辯論邏輯與數據。現在北京開緊政協、人大會議，中央鍾意和諧、團結穩定壓倒一切，有人為咗向中央表態支持團結，於是唯有公開喊話，指某些人挑撥。
記得去年呢個時候，董特首因腳痛、身體不支為理由辭去特首職位，曾蔭權火速出任臨時特首，召開緊急行政會議，但行政會議召集人梁振英人在北京，參加政協會議，唔肯趕返嚟參加會議。今年又如何呀？政協常委梁振英係唔係人在北京？咦，唔係噃，有位老友好心水清，睇到一段小新聞，話梁兄哥愛子情切，飛咗去英國參加學校家長日，同時為愛兒揀選英國大學，咁大件事，梗係緊要過舊年嘅緊急行政會議，亦都緊要過以常委身份出席政協會議，堪稱為家長親子典範。各位家長請注意，如果你哋口口聲聲話重視家庭，愛錫兒女嘅，以後請以梁振英為模範，家庭要事與國家會議之間，如有衝突，唔好講忠義兩難全呀，一定以家庭為先。
當然，家庭要事辦完，就以第一時間自英國飛去北京，相信今天梁振英會在北京出現。佢嘅擁躉自然希望佢心想事成，乖仔入到劍橋、牛津，光耀門楣！