近排樓市係咪好掂？蘭西唔敢亂畀意見，但睇完代理送過嚟嘅資料，就肯定令人覺得好掂，因為唔少屋苑嘅成交量都勁升。
例如港島龍頭屋苑太古城，今個月頭五日有十三宗成交，比上月同期多一點六倍。九龍指標屋苑紅磡黃埔花園五日同樣有十三單買賣，升近一點二倍。荔枝角美孚新邨六日有三十個盤易手，比上月同期多一倍。另外，九龍灣德福花園周末有六宗買賣，屯門大興花園同期則有四個盤成交。
再睇深一層，本月初二手成交雖然激增，好多屋苑都升成倍，但唔等於個市好好。因為上個月樓市靜到暈，成交疏落，同一單成交，竟然有幾間代理行都出稿。個基數咁低，今個月只要多番些少買賣，就好似勁升咁囉。
例如太古城有過萬個單位，五日得十三宗成交，係咪算多，大家心中有數。假如用三十日咁按比例去計，一個月都係得七十八宗。
樓市由舊年第四季到𠵱家靜咗半年，市場點都會累積到啲購買力，加上銀行減樓按息去搶生意，發展商又開盤搞吓宣傳，始終有啲買家會忍唔住手入市，咁最開心梗係代理。
電郵地址：[email protected]