噚日滙豐公布業績，盈利增長完全超越晒所有分析員預測。相信各大行嘅分析員對獅子錢莊嘅盈利預測傾向保守，主要因為自從2003年收購美國財務公司HouseholdInternational之後，市場普遍對滙豐透過正常增長嘅能力有懷疑，亦再唔會有以往嗰種爆炸力，結果事實證明世界仲有好多有潛力嘅市場係可以慢慢發展，要增長唔一定要靠收購。
𠵱家滙豐亞洲及南美業務加起都只不過係整體稅前盈利15.4%，大家可以試吓幻想，如果滙豐可以將其他新興市場嘅業務搞起，仲要做到好似香港咁有聲有色，要維持過往嘅增長率並唔係難事。最重要一點，就係呢啲市場本身都已經係高增長，所以只要世界和平無驚無險，滙豐呢個「環球金融．地方智慧」嘅策略絕對可以用上十年八載。
香港係國際金融中心，但始終係一個非常成熟嘅市場，呢一點對唔同嘅人嚟講有唔同嘅意義。對滙豐呢啲環球大機構，香港只不過係一個穩定嘅收入來源，所以亦冇必要響呢度大量投資人才。
金融精英要回饋社會
最初銀行係老外嘅世界，之後喺七八十年代畀咗唔少機會本地精英，不過未來嘅銀行大班，就要同全世界嘅精英競爭。老實講，香港唔再係一個馨香嘅市場，所以一旦成本上漲，人家唔一定要將啲後勤運作留低。銀行大班有唔少都係紅褲子出身，一步一步由低做起。試問如果連呢啲手板眼見嘅工作都留唔低，香港第日又點可能有機會再出更多嘅鄭海泉呢？
利世民知道，有唔少財金界朋友都對特區推行廣東話教學有極大保留，希望佢哋會念在香港畀佢哋嘅機會，肯企出嚟為香港金融業嘅未來講一句公道說話，咁就功德無量！
利世民