全國人大政協會議喺北京舉行，雖然政治意味較濃，但由於唔少人大政協係商界中人，少不免會講吓金融經濟。好似身兼港區政協嘅港交所主席李業廣，噚日就喺港澳政協座談會上，推銷港交所有幾巴閉。
原來上個禮拜五港股市值再創新高，達9.25萬億元，較去年底又增加一萬多億。
李主席話，近年台灣公司來港上市多咗，去年喺台灣證券交易所新上市嘅公司有七家，總集資額約13億港元；但同期有八家台資公司來港上市，集資額74億元，係台灣嘅5.7倍。
佢解釋話，由於台灣對台商運用資金有限制，規定台灣上市公司喺大陸嘅投資，不得超過喺台灣淨資產嘅40%；但好多台商嘅工廠都喺大陸，資金需求自然亦喺大陸，如果將台資喺內地企業分拆到港上市，由於資金唔係通過台灣籌集，可以100%投資到大陸，不受限制。睇嚟港交所鬼唔望台灣繼續採取抗拒大陸嘅政策，咁就有生意做；政治上是否正確，係另一回事。