平時行街食飯，中西美法日又Fusion又新派菜，兜兜轉轉發覺自己愈來愈忘本，唔記得港式一盅兩件其實好抵撐，今次介紹呢間「豬仔點心小廚」，唔係大餐廳大酒店，不過就有一份濃厚親切感，最重要係24小時營業，半夜三更踢拖幫襯一樣得。老闆仇師傅曾於「東海」、「鏞記」做點心，人稱豬仔，被人叫得多，索性用自己花名開舖：「我提供過百款點心，親手打麵粉做點心皮，最正係蝦餃，夠膽講日賣過百，你試過就知好味道。」我試過，的確做到皮薄餡靚。除此，經典鮮雞球大包絕對係必試力作，餡料有燒肉、鮮雞肉、芫荽同鹹蛋等等，我咬一啖仇師傅即時插口：「『蓮香樓』出名嘅大雞包都唔夠我大個同多餡呀！」吃消夜為醫肚，一個大雞包足足夠2個人食，必吔！
豬仔點心小廚（34269995）
地址：深水埗元州街35號地下
營業時間：24小時
