睇完《斷背山》感覺良多，暫且押後《滑雪 旅》，好好斷背一番。
今年奧斯卡《斷背山》大戰《慕尼黑》，李安大戰史匹堡，個人好恨睇《慕尼黑》，至於《斷背山》，如果唔係搞到咁大陣仗，好似唔睇就Out爆咁，未必好有慾望入場睇兩個着到李家鼎咁款嘅牛仔此情不渝，海枯石爛。
《斷背山》好睇，最大歸功於李安導演係一個唐人鬼佬，有唐人的靈魂，又對鬼佬文化有清晰了解，有別於其他華籍黃皮黃心外勞導演，唔會淨係識拍動感電影，在《SenseandSensibility》一役中李安導演跟出名有內涵的文學演員EmmaThompson合作愉快，在圈中早已聲名大噪，及至《臥虎藏龍》名利雙收。有緣在午餐聚會時遇到鄒文懷先生，大家討論《臥》片贏盡中西的原因，「劇本好吖」、「演員做得好吖」、「章子怡夠姣吖」、「動作設計得好吖」、「夠噱頭吖」，鄒文懷先生聽完大家搶答之後，呷一口茶然後帶着微笑地說：「導演好，因為李安導演真係識西片嘅，任你齣戲拍得再好，但如果刀叉碗碟擺得唔啱，西人莫講話幫襯，根本就睇唔起，正如你開間餐館，就算啲餸煮到天花龍鳳，點好味都好，Setting唔啱，TableManner唔啱，西人就睇唔起，睇唔起就唔會埋枱，唔埋枱就唔會起筷，唔起筷就即係唔會幫襯。」大家聽到點晒頭，我幾乎攞紙筆出嚟抄低，鄒先生再呷一口茶：「不過知嚟都係得個知字，因為呢樣嘢冇得學，係個人修為，係就係，唔係就唔係，冇得夾硬嚟。」
鄒文懷先生呢番說話咪就係經驗累積與智慧囉，咪就係袋錢入我哋袋囉。