從事舞台劇創作的林奕華九三年在柏林訪問李安時，曾強烈批評《喜宴》。談到李安最近的力作《斷背山》，林奕華前日大讚《斷》片拍得好，能讓觀眾有所反思。
李安在自傳《十年一覺電影夢》中透露，九三年《喜宴》在柏林影展上映時令他很緊張，雖然現場觀眾反應很好，但第一個訪問他、代表香港同性戀團體的「Rambo」林奕華，卻將他「海削」（強烈批評）了一頓，罵一頓還不過癮，後來又寫了一大篇文章繼續罵。
收李安回電
林奕華前日接受記者訪問，提到當年批評《喜宴》，他解釋不喜歡這齣電影的原因：「我唔鍾意結局安排男、女主角發生關係、父母又要扮到好似唔知咁，大家互相隱瞞，係一種妥協。而《斷背山》（BrokebackMountain）表面上雖然係一種妥協，但主角一直都唔肯做一個決定，呢個決定就留畀觀眾自己去反思。」林奕華又指所有人都試過下不了決定，他說：「好多人做咗決定之後係唔開心嘅，甚至佢嘅決定係做出嚟畀人睇，而呢個決定又會影響到其他人。」
林奕華透露早前有編輯想安排他訪問李安，但最後沒有成事，之後他便放了一封給李安的信在電影中心，數日後就接到李安回電，李安對他說：「你千萬不要介意那件事，我不是為了你的批評不開心，這是有趣的經驗。」
林奕華表示看李安自傳《十》令他很感動，他說：「好多爸爸就係李安所講嘅一樣，如果子女係有個性，有自己嘅反叛位，彼此就會有衝突，李安嘅電影其實係好貫徹到呢種風格。」
讚有文學性
對於《斷背山》，林奕華表示很喜歡，覺得很有文學性，在林奕華心目中，一齣好電影是應該跟文學作品一樣有起、承、轉、合，《斷》片就做到這點，他說：「《斷背山》成套戲都係暗湧，畀人嘅感覺好大，唔係一套同性戀電影咁簡單，睇到李安導演成熟咗好多，佢咁多戲當中我最鍾意《臥虎藏龍》，我睇咗好多次。」
林奕華續說：「我相信一個藝術工作者，與其有人不停話你知我好欣賞你，呢種開心唔及一個本來唔鍾意你嘅人，由唔鍾意你變成欣賞你。」
採訪：李珮洳 攝影：陳俊強
