南太電子（2633）係半冷門股，去年中大股東要將之私有化，才開始為人注意。去年底，私有化失敗，股價亦由高位大幅回落。反對私有化的股東，肯定係認為「未到價」，現時在股價方面已吃了虧，但難保不會「先苦後甜」。
南太係04年4月上市，招股價3.88元，上市後最高曾見3.95元，之後便反覆回落。控股公司南太集團（南集）提出私有化（同時進行的尚有J.I.C.科技（987）），出價1.80元，比南太停牌前股價1.22元，有溢價47.5%。
南集出價可謂「慷慨」，但小股東亦具「慧眼」，明知南太係金，一於同佢結伴同行，可能揸多一年半載，又會有另一番風光。上次私有化價格1.80元，同招股價3.88元比，着實係有好大距離，若大股東舊事重提，「加價」空間好大。
現時南太又落番1.30元水平，一句話，博得過。
生意多到做唔切
大股東提得私有化，九成九嘅理由，係對公司有信心。上月中，南太宣布05年度（12月年結）的第4季業績，盈利同比下跌3成多，股價應聲由1.40元跌到落1.13元才反彈；不過，在電子及通訊產品工序外判的大趨勢下，南太可謂食正呢個大浪，生意多到做唔切，前景係好樂觀。
南太係高科技股，產品主要有光學裝置（提供手機使用的CMOS攝影鏡頭組件）、教育產品、家庭娛樂裝置，以及流動電話配件（包括去年推出的藍芽耳機）。現時新出手機幾乎全部配有內置鏡頭，為南太帶來無限商機。
05年全年，集團營業額1.67億美元，升2.29%；獲利2213萬美元，減2.69%，每股盈利2.6美仙（折20港仙），往績PE6.5倍。今年開始手機藍芽產品和CMOS相機模組定單增加，盈利可重拾升軌，估計每股盈利達23仙，升15%，高科技股PE8倍計（好保守），股價已可見1.84元。
大股東要私有南太，年中可捲土重來，今次不會打無把握之仗，要打動小股東，加價事在必行，是2元？或是2.18元？現時揸定南太，等幾個月，賺5成機會好大。
郭兆誠