個市短期點走，收市後滙控（005）盤數彈出，會有指導作用。大行睇滙控，唔係一面倒睇好，屬於好事。只要盤數靚過平均預期少少，滙控就有機會彈升1-2元，並帶番起個市。
兗煤C輪9855：神華（1088）上周大發神威，5日升幅高達12.3%。兗煤（1171）全周只升3.9%。大行認為神華質地較好，畀佢較高評價。不過兗煤PE大約只係神華7成多啲，可追落後，博神華將兗煤帶住上。
鎖定兗煤，搵C輪埋手，最靚對象係9855，交投最多亦係呢隻，7月下旬夠鐘，輪價86仙，溢價0.9%，槓桿率7.7倍（有效5.6倍），引伸波幅31.9%。成交金額第2大嘅4838，壽命短幾日，有效槓桿率又低少少，但溢價則高達9.7%，高過9855好多。要炒，梗係揀9855。
太AC輪2270：太A（019）全周升1.80元，升幅2.4%，跑贏大市。上周五晚CapitalGroup披露增持太A194萬股，涉銀両1.45億元，最新持股量8.12%。同日，瑞銀有份報告，訂太A目標價90元（現價75.50元）。信瑞銀之笛，跟CapitalGroup搵食，揀C輪炒，2270最啱，7月中到期，輪價57仙，溢價1.6%，槓桿率13.2倍（有效9.3倍），引伸波幅19.4%。其他同類輪，冇隻夠佢靚。
章盛