小金王胡經昌冇做議員一樣咁活躍，呢個新正頭，華華喺各春茗撞過佢冇十次都有八次，忙完畀面派對，又飛去廣西做義工，去貧困山區搵合適嘅地方起學校，幫助山區貧困學童。
佢話通常禮拜五下晝去，星期日晚返，次次交通食宿都係自費，有時趕起上嚟，而地點又近嘅話，仲會即日來回，都幾辛苦㗎，不過見到山區小朋友嘅學習環境有改善，就好開心。
唔好睇胡經昌平日笑笑口，乜都冇所謂咁，其實佢對要求資助嘅申請單位好嚴謹，除咗要佢哋填一張基本資料表以外，仲要對方填好多嘢，有乜唔順眼嘅地方，又要對方跟進改善，佢話咁做都係想班小朋友得益，唔係專登為難。
胡經昌話呢項義務工作，始於佢做小童群益會主席年代，家吓佢雖則升咗上「神枱」做會長，但每年仍然會去廣西走幾轉，亦帶過自己嘅小朋友去廣西，等佢哋知道自己身在福中，不過就從來冇同太太一齊去，問佢點解？佢笑話，攞苦嚟辛嘅嘢自己做就得啦！