電盈前副主席張永霖退咗休都冇時停，華華前兩日同佢傾偈，佢話近日忙到飛起，事關3月8日港大公開進修學院（SPACE）喺會展開Party，慶祝成立50周年，佢作為董事局主席，就梗係要勞心出力啦！
除咗港大個Party之外，張永霖要定期上電台為節目錄音，周不時又要幫「小母牛」做義工，又要去唔同學府演講，都真係忙過返工，但佢仲可以抽到時間去天津拍賣會，買咗幾幅石魯嘅作品，唔到你唔服。
收藏品又多咗，咁會唔會喺4月蘇富比拍賣時，再出手賣畫呢？張永霖笑笑口話，自己又唔等錢使，相信未來兩三年都唔會再攞嘢出嚟賣，不過佢就有興趣買嘢，但買乜就梗係唔講得，以免到時俾人搶高個價。
農曆年期間大小春茗無數，華華都去唔少，但偏偏撞唔到張永霖，以為佢去咗外地避年，點知佢話日日喺屋企睇書。佢話去一個飯局起碼冇咗兩三粒鐘，倒不如睇吓書實際啲。睇乜書？原來係董橋！唔知佢係咪對住華華先咁講！