前幾日有調查顯示，勞動市場好景咗，員工流失率創四年來新高，企業要留住人才，大部份都會錢字行頭。但你出得起錢，人哋又可能出更多，所以滙豐綜合理財中心主管張盧慧貞（圖）就話，要留住個人，最緊要係留住同事個心，所以佢哋CallCentre班管理層，個個月都會絞盡腦汁，等員工對公司多啲感情。
好似情人節咁，今年送滋潤嘅蜜糖，舊年就送心形朱古力畀同事；復活節期間舉行復活蛋比賽；聖誕時，佢自己就扮聖誕老人派禮物；端午節就送迷你糭……總之每個月都會諗計冧班夥計！
佢又話，家吓CallCentre有700個員工，自從做咗呢類關心行動之後，流失率大約係一成多啲，比市場嘅三成低一半，成績算係幾好啦！