有好友話進士近排講啲同選舉有關嘅嘢太多，好應該focus番喺啲Policy嘢度。完全回應佢要求又會嘥咗一啲政圈八卦料，今個禮拜就試吓可唔可以兩者兼顧。
早排本港旅行團喺外地遇到意外，令外界對旅行團嘅管理以及保險嘅問題再度關注，尊貴嘅立法會議員楊孝華卒之打破「多年」嘅沉默嘞。講到旅遊業，普羅市民會想起「莎姐」周梁淑怡，但大家卻忘記咗原來楊議員先至係自由黨旅遊業功能組別嘅議員。我諗大家可能會對佢兩位公子嘅消息會更留意一啲，細仔Jeremy就同張燊悅拍拖，大仔Jonathan就成日同向展平、巫雨平之流clubbing。所以，楊議員忽然以「一張不對症的藥方」為題喺報章撰文，進士梗留心啦，點知唔睇猶自可，一睇火都嚟！
文章內容大致指因為旅遊事故，某女議員致函葉澍堃局長要求規定旅行社替顧客購買「專業責任保險」，同埋加強對旅行社嘅管理。楊議員則指該女議員「予人外行充內行的感覺」，明寸人哋唔識嘢！但楊議員又憑咩嚟寸人呢？佢咁講：「911以後保險公司大幅提高旅行社嘅保費，甚至剔除『專業責任保險』中『團友傷亡賠償』嘅條文，肯提供有該等保障嘅保險公司極少兼會對賠償設上限，就是旅行社購買了也不代表他們可十足應付申索。」楊議員之後話嗰個不明就裏嘅議員因不明白業界面對嘅實際困境，所以胡亂：
一、911喺邊年發生呢？
二、呢幾年你做過乜呢？
三、呢幾年有幾多旅行團出事呢？
雖然我唔鍾意民建聯唔爭雙普選，亦唔了解前民航處處長林光宇嘅個人能力，不過我衷心希望旅遊業功能組別下次選舉時可以「變天」。我亦喺度恭喜南區嘅市民，楊議員亦打算07年區會選舉將議席「傳位」畀囝囝。
自由黨講旅遊都係搵番莎姐啦，楊議員都係繼續做「立法會呆B」，扮演腦幹死亡嘅角色會更恰如其份。
葉局長亦應該好好回應女議員嘅建議，冇理由次次旅行團出事都係靠團員自己買保險，業界同保險業傾唔掂，你就派鄭汝華去幫吓手啦！