劉細良入中央政策組做全職顧問，結果左派反應勁大，梗係啦，人入政府佢入政府，民建聯克勤仔只係做吓影印同跟班，細良就唔同，幫煲呔做研究，有份畀意見煲呔，點都接近權力核心過克勤啩。
向來直話直說嘅鄺大狀都戥克勤仔唔抵，噚日接受商台節目訪問時，直認細良呢個位惹起左派人士不滿，酸溜溜感覺仲好鬼濃，又話換轉係佢，都好想做劉細良㗎，鍾意行行企企又得，鍾意出謀獻策都得，人工咁高地位又尊貴，係人做咗都生活無憂，恨做細良個位恨到流晒口水。
不過，鄺大狀好現實，知道呢個只係春秋大夢，因為佢同煲呔關係差已經係公開秘密，煲呔點都唔會請佢入政府。
雖然上次都有提名煲呔做特首，但鄺大狀話下次就未必有交易，事關一日搞唔掂最低工資，勞工界一日都唔like。如果煲呔以為勞工界啲票一定ok，咁佢就真係太自以為是喇！
爆料熱線：29290000、27860099
報料傳真：26239278
報料電郵：[email protected]