楊鐵樑早前喺一個追思禮上暈倒，經過詳細檢驗後，一切冇事，八方日前打電話同佢傾偈，佢都唔知幾精靈。楊官話，夏天就七十七歲，唔到你唔認老，以後要減少應酬同外出，多啲喺屋企靜靜哋唞吓。
楊官𠵱家已經冇晒公職，佢話自己性格好似個火車頭，一做嘢就唔停得，又或者太投入。好似去幫青年協會教學生英文同禮儀，亦教得好開心，一個小時講，一個小時問，有時講到停唔到，興奮到血壓高㖭。
經過今次事件之後，一切課堂都要暫停，除咗喺港台教英文節目，因為錄音比較易控制時間，所以會繼續做。
八方問楊官有冇見煲呔或者老董？佢話兩個都冇，既然已經退休，就希望過啲優哉游哉嘅生活。選第三屆特首？「太老啦！點會再選。」楊官當年好勇，有大法官都唔做去參選第一屆特首，真係令人敬佩。
爆料熱線：29290000、27860099
報料傳真：26239278
報料電郵：[email protected]