元朗又新街係出晒名嘅食街，嗰度最有名梗係五十六號置富大廈地下嘅「B仔凉粉」啦，佢哋佔用四個相連舖，夾埋有幾千呎，淨係個招牌都夠晒搶眼。但條街嘅舖位一般都只係得千呎，想要相連舖就真係非常難，只可以打樓上單位主意。
喺「B仔凉粉」樓上嘅兩層食肆舖，最近先後俾人租咗，二樓約五千呎，由特色飲食店以月租八萬八承租六年做分店，三年生約三年死約，呎租十七個六。租客喺觀塘嘅總店都有三千八百呎，佢見元朗區消費力強，所以不惜山長水遠都要殺入元朗區。
中原地產新界商舖部助理營業董事黃金鳳表示，租客一睇即中，業主見佢咁有誠意，所以肯減收兩千。而上址一樓就喺早前由另一食肆以每月九萬承租，租期同二樓一樣。
呢兩層係由同一業主，分別喺九六同○二年買入，涉資共一千九百三十萬，𠵱家月收十七萬八，計落回報有分一，認真吸引。
電郵地址：[email protected]