市場盛傳羅嘉瑞嘅鷹君準備將旗下王牌物業──中環花旗銀行大廈，以房地產信託基金方式分拆上市，食住個REIT潮。中環花旗銀行大廈係甲級商廈，同某大地產商分拆啲三、四流物業做房託有別，但鷹君為省靚招牌都唔敢怠慢，近排佢哋就經常搞嘢。
例如之前財爺公布預算案當日，嚟個「財爺派糖，我派咖啡」，由鷹君畀錢，喺花旗銀行大廈嘅PacificCoffee請人飲咖啡。噚日，羅醫生又玩溫馨，搞咗個「童心看中環」嘅活動，請咗一大班4至12歲嘅小朋友，喺香港公園奧林匹克廣場集合，一齊為中環寫生。從奧林匹克廣場望出去，之唔係花旗銀行廣場囉！咁都俾佢諗到，個搞手應記一功。
星期日係家庭日，雖然係公司搞活動，羅醫生個猛將李澄明一早就帶埋李太到場。噚日天色陰陰地，工作人員好擔心突然落雨，點知李太話唔使驚，嗱嗱聲叫李澄明喺架車攞兩把遮出嚟。在場工作人員竊竊私語，話兩把遮邊夠十幾個細路兼大人用？點知李太話：只要老公攞遮，個天就唔會落雨！果然直到散場，一滴雨都無落過。
李華華
讀者如有任何意見或報料，歡迎發送電郵至[email protected]。