正東唱片計劃出一隻新碟，收錄十幾個歌手嘅新歌，其中陳小春會夥拍一位小朋友，組成新組合灌錄新歌。噚日小春就以評判身份，去到尖沙嘴出席名為「一把童聲．一次合唱．與陳小春聲聲相識」嘅招募活動，喺十幾個小朋友裏面親自揀選一個最適合嘅做拍檔。
唧都唔笑
有份參加招募活動嘅小朋友，大部份都係得五、六歲，佢哋喺台上施展渾身解數，希望博得小春投信心一票，但係等到小春上台同佢哋影合照嗰陣，唔知係怕醜定係驚咗小春哥哥，佢哋竟然唔夠膽行埋佢身邊，影合照嗰陣更加唧都唔笑，場面都幾尷尬！
搞咗幾分鐘，幾個小妹妹先至夠膽行近小春，同佢平排影相，但係當司儀李浩林建議呢幾位小妹妹錫小春哥哥一啖時，四個小妹妹望一望小春，好似見到十大惡人咁，全身僵硬，郁都唔敢郁；至於原先已經踎低等緊香吻嘅小春見冇人夠膽錫佢，都有啲尷尬，即刻搵頂冷帽笠頭。最後又搞咗幾分鐘，小春都係食檸檬，李浩林惟有打圓場叫小朋友落台，小春就作狀獻飛吻畀小妹妹，咁先搵到下台階咋，陰功！
