關注組組黨簡直係政界盛事，唔搞得好好睇睇，都有負外界對佢哋嘅期望，所以所有組黨籌委會成員都好投入，直情忙到亂晒龍，其中最經典都可以數發言人毛孟靜（圖）。
毛孟靜噚日一朝早諗住揸車去九龍塘開會，點知當佢個腦中不斷浮現組黨嘅事時，竟然無情情踩咗油入沙田。九龍塘同沙田喎，真係相距十萬九千丈遠，咁都可以錯，證明毛小姐真係為咗組黨而心思紊亂，難怪佢叫大家唔好以為組黨無乜嘢搞之嘛。
繼早前余若薇收到街坊送出嘅五百蚊捐款後，毛小姐都話收到一百蚊美金捐款，不過關注組已經決定，唔會將呢兩筆錢放入銀行，但就會用個相架，將佢哋珍而重之咁鑲起，話唔定會掛喺關注組灣仔總部。話晒都係第一次收嘅捐款，咁有紀念價值，用咗點都係嘥啲，反而鑲起佢，得閒望兩眼，一定為佢哋帶嚟好多回憶㖭。
爆料熱線：29290000、27860099
報料傳真：26239278
報料電郵：[email protected]