《蘋果日報》不久前有一位作者李兆富，不知何許人，在主筆盧峯旁邊寫經濟評論，秉承保守派經濟學家宗旨，高舉反對干預市場旗幟，意見鮮明，寫得有味道，讀者睇得過癮。但最近李兆富失蹤，去咗邊？老友記問左丁山：「呢位作者開始受到注意，係唔係已經俾肥佬黎炒咗？」佢問我，我問邊個？以事論事，呢個專欄正開始為讀者受落，發揮影響之際，突然停寫，未免可惜。你知啦，香港懂得經濟學而又update，日日評論本港經濟政策者，少之又少，香港目前好需要李兆富呢類評論嚟頂住逆流。
所謂逆流，就係干預派死心不息，企圖逼迫特區政府推行干預政策，例如：（一）要求政府增加公共開支，（二）要求增加福利，（三）要求政府做呢樣，做嗰樣，（四）《明報》報道，民建聯向曾特首提建議書，主張扶助製造業，曾特首睇咗幾頁就睇唔落去，民建聯覺得冇癮，（五）的士業部份人士在中環阻塞交通，包圍美利大廈，反映政府過往控制的士/小巴用石油氣嘅價格，完全失效，但廖秀冬局長似乎仍然矇查查，（六）工聯會企圖逼使房屋署不按理出牌，墊支德祥建築欠薪……凡此種種，一時數都數唔晒，意味香港雖然經過幾十年「積極不干預」政策洗禮，但干預派（包括自由黨、民建聯、工聯會、職工盟、民主黨、四十五條關注組）代表種種不同利益或錯誤經濟理念，始終其心不死，係要政府干預。面對咁多經濟政策反對派，曾特首雖係夏鼎基門徒，佢能夠頂得住壓力幾耐，令人懷疑。
故此呢個時候，凡相信自由市場理論嘅人士，得閒就要奮筆疾書，精神上支持曾特首頂住民建聯。希望能夠盡量維持政府積極不干預嘅心態。《蘋果日報》社論發揮作用，此其時也，唔通將責任交晒畀《大公報》乎？陳婉嫻在《明報》專欄講復興製造業，《大公報》社論話唔好再發搞工業之夢，左丁山重以為李兆富過咗檔㖭！
【編按】李兆富是《蘋果批》主筆之一，每周有兩篇文章於該專欄刊出。