稅務局局長劉麥懿明（圖）平時講數講稅時一本正經，應該都無人諗到，佢細細個時竟然係反斗星一名。好似佢呢位小學會考成績名列全港百名之內的高材生，最終考唔到入第一志願嘅瑪利諾，反而派咗去伊利沙伯中學，呢一點令佢媽媽𢱑爆頭都諗唔明。
媽媽唔知啫，作為囡囡嘅劉太就好清楚，原來佢唔係太鍾意瑪利諾比較保守嘅作風，反而覺得男、女校嘅伊利沙伯中學幾好玩，結果偷偷地掉轉個選校志願，媽媽都敢呃，真係幾大膽喎。
其實入咗伊利沙伯中學都唔錯，至少識到廣播處處長朱培慶呢位同班同學。劉太話嗰時朱處長一樣都好似𠵱家咁文質彬彬，加上係領袖生之首，所以喺一眾同學中好威嚴㗎。
劉太老公係佢初戀情人，一段感情可以維繫咁耐，梗係要付出好多，好似劉生咁，無論當日工作幾忙幾激氣，一返到屋企即係會笑番，唔想老婆一齊唔開心，呢份細心，當然令到劉太好感動，重將呢樣嘢視為老公每日送畀自己嘅禮物，都唔知羨慕死幾多女性。
爆料熱線：29290000、27860099
報料傳真：26239278
報料電郵：[email protected]