街市買到嘅帶子絕大部份由廣東省入口，之前有問題嘅「花群」帶子主要嚟自湛江，由於來貨價平，所以只係賣2、3蚊隻，至於其他常見嘅帶子有扇貝、帆立貝（又稱元貝）、淺水帶子、沙插帶子等等，野生嘅帶子成本價比較高、來貨無咁穩定，所以𠵱家多數帶子都係嚟自人工養殖場，大概養3年左右就可以採收。
半透明肉最鮮
帶子都有分雄性同雌性，半月形嘅內臟如果係白色就係雄性，紅色就係雌性喇。至於想知帶子夠唔夠新鮮，最緊要就係睇佢嘅肉色雪唔雪白，帶半透明狀嘅通常係新鮮貨，如果唔透明，顏色白得嚟有啲濁嘅，奉勸大家千祈唔好買！
齋食白肉最穩陣
帶子買番屋企後，記住去乾淨內臟同旁邊嘅腸，好多人鍾意食帶子裙，不過為安全起見，淨係食白色肉嘅部份就安全啲。另外，好多人會連殼蒸帶子，所以記住連殼都要擦乾擦淨呀，無謂搵命博嘛！
加蒜頭可殺菌
最後，為咗令帶子徹底煮熟，煮之前可以喺帶子肉表面用刀𠝹開少少口，又或者煮嘅時候加啲蒜茸豆豉之類殺菌材料一齊煮，咁就唔使冒肚痛危機或者捱無味嘅人工帶子咁慘啦！記得上年年頭出現過食帶子中毒事件，我哋生意亦大受影響，其實好似政府話齋，所有貝殼類食物只要徹底煮熟，就可以減少好多細菌感染情況啦！