首先，孫柏文多謝大家的支持。由今天開始，各位逢周一至周五都可以睇到我用我隻金手指去篤、篤、篤，唔需要再等到星期五先可以睇到小弟嘅專欄。為了報答各位的支持，小弟今日為大家提供一個長線投資建議。雖然大家可能對短炒投機貼士更有興趣，不過為免「為畀貼士而畀貼士」之類例牌貨，唔覺意之下令到大家短線投機變成長線投資，所以孫柏文開始就強調這是一個長線投資的建議。
建議買入：白銀 目標價：每盎司120美元 年期：十年
大家都可能知道，每年從世界各大銀礦開採出來的白銀有大約五至六億盎司，而每年全球消耗大約八億盎司的白銀。所以每年白銀都是求過於供，而且白銀往往都是其他礦產的副產品，所以供應量很難因價格飛升而提高。
這個供求錯配現象最大變數，就是不知道世上白銀存貨有多少。如果存貨多，供求錯配可以維持一段相當長的日子。不過，我相信大家都知道上周白銀升穿了10美元一盎司，這個對我來說，就是供求錯配到達了沒有許多存貨的先兆。10美元一盎司，就是這場燎原之火的開始。
紙上白銀如買外圍
雖然還有一百多種理由白銀會升，不過這個根本的供求錯配已經足夠令到白銀升到孫柏文的目標價：120美元一盎司。我無說錯，目標價真的是120美元一盎司，是上周收市價的十二倍。當然要見到這一天也要有耐性，因為可能要等十年。
相信今日香港財經吹水佬界中沒有一個比我對白銀更有信心。以後，白銀每一次升，我都會出來邀功，每一次跌，我都會叫你「趁低吸納」。
最後，勸喻大家不要貪圖方便而買「紙上」白銀，要買就買實貨，放在保險箱或床下底。打個比喻，如果買白銀像賭馬一樣，買「紙上」白銀就係幫襯外圍佬。白銀升至120美元，就好像你買中了一注六串一獨贏過關，到時外圍佬走路無得賠，唔好話我冇警告過。
孫柏文