寵物花園：劈炮唔跑飛毛腿～走佬呀～

鋼之鍊金術師為了練成能令人重生嘅寶石而努力，而令我哋呢班鋼之「練兔術師」落力嘅原因，係為咗佢哋嘅──兔仔。佢哋有鋼一般的鬥志，終極目標係訓練自己嘅愛兔喺一年一度嘅小動物運動會爭出風頭，向自己挑戰，向時間挑戰，成為賽跑明星—兔界嘅劉翔！
記者：梁偉倫
攝影：伍慶泉
鳴謝：PetsCafe（www.pets-cafe.com）

賽事直擊

■「練兔術師」Cherry成功出蕉，賓尼兔QQ直衝終點！可喜可賀！

■有人歡喜有人愁，都係出蕉啫，不過呢隻兔兔就只係顧食，唔肯跑。

■雖然成日都講搵食搵食，但係呢隻貓貓兔就絕不為五斗米而折腰，有骨氣！

■呢位「練兔術師」袁先生出茅招用手推，現今嘅高科技令你嘅罪行無所遁形！

■平時我哋心急都會催促人，原來在兔兔身上亦行得通，不過此「催」不同彼「吹」。

賽前熱身：各師各法

由PetsCafe主辦的小動物運動會已經是第二屆舉行，今屆仲破晒紀錄，有超過五十隻兔仔參加，應該係有五十多位鋼之「練兔術師」幫佢哋嘅「拍檔」報名至啱！大戰場地選址為地靈人傑嘅西貢海下灣，賽制分輕量級（1.61公斤以下）、中量級（1.61公斤至3.5公斤）同重量級（超過3.5公斤）三大組別。各位主人同兔仔一到場就出盡渾身解數熟習場地，而且仲各師各法，令自己「鋼練」出嚟嘅兔仔有最佳的發揮！趁呢個時候，即管等小記四圍打探吓軍情！

■有「練兔術師」一到場就命令自己隻兔仔喪跑，咁會唔會嘥晒佢哋啲體力呢？

■小妹妹精力過盛訓練埋人哋啲兔仔，但係小記覺得佢係間諜，喺度消耗人家兔仔嘅體力！

■呢位「練兔術師」文小姐嘅小白，係上屆輕量級冠軍，今年成功增磅挑戰重量級冠軍寶座，嚟到第一時間就落跑道熱身！

■陳小姐同男朋友護送一家五口嘅侏儒兔家族嚟參賽，囡囡孱仔得閒瞓陣先！

■開講話：友誼第一、比賽第二，兩位兔選手就親自向大家示範。

■兔仔朋友好耐無聚埋，傾吓偈聯絡吓感情先！

秘技公開：練兔術之道

咪睇各位「練兔術師」好似胸有竹成咁，鋼之鍊金術就話有等價交換，不過鋼之「練兔」就只有──「冇價交換」。因為兔仔同阿旺都一樣咁「單純」，即係蠢蠢哋啦，要佢哋自動自覺向前跑，唔可以同佢討價還價，最易嘅方法梗係身體接觸！不過大會絕對唔容許任何主人「兔」身攻擊，所以好考呢班「練兔術師」的耐性。好彩佢哋平時對自己的兔兔有相當深入的了解，可以說到了心靈相通的境界（因為成日見佢哋同隻兔兔密密傾），應該不會有任何難度。據佢哋放風話當中的秘技，原來是平時要留意吓有乜嘢吸引到自己隻兔仔，一於實行沿途「餌誘」行動！