黃宗澤和胡杏兒的緋聞始於拍攝《我的野蠻奶奶》，當時盛傳他們戲假情真，但這段非常可疑的情侶關係倒耐人尋味。黃宗澤說，他與杏兒是很好的螢幕情侶和演戲拍檔，他承認拍《我》劇期間曾愛上她：「同佢拍戲時，我當然有feel，如果唔係《奶奶》套劇就唔會有咁好效果，但我只係個角色鍾意佢，分得好清。佢好勤力，工作態度好好，戲外亦幾啱傾，我哋對做嘢、演戲、一啲諗法都不謀而合，所以咪同佢friend囉，有時我哋會傾偈，問吓做戲仲有乜嘢缺點，大家互相批評。」
拍拖順其自然
「劇裏面係有鍾意佢，陳錦鴻講過幾享受拍劇嘅過程，話公司畀錢佢同女主角談戀愛，係幾enjoy嘅，我都同過幾多人談過戀愛㗎，同陳敏之同宣萱都有。」
但戲外抽身，說不愛就可以真的不愛麼？「我又未到演一個角色之後仲會迷惘，我哋真係好朋友嚟，又同一個經理人、同一個髮型師、同一個化妝師，有騷有廣告又一齊做，但肯定冇同佢拍拖，直情冇時間諗呢樣嘢，只可以話幾夾。」
胡杏兒說過不排除跟黃宗澤有發展可能，黃宗澤的答案同樣模稜兩可，怪不得他說跟她合拍了，「第一，我事業行先；第二，𠵱家唔會有時間；第三，若然個天畀緣份，點樣避都避唔到，平常心係我人生座右銘，拍拖嘅話，唔會刻意公開，亦唔會夾硬收埋，你哋知道咪知道囉，正正經經拍拖唔係乜嘢大事。」
在胡杏兒出現之前，黃宗澤跟唐寧也傳過拍拖，「佢係同我合作最多嘅女藝員，演親都係我鍾意佢，雖然拍戲成日暗戀佢，但都係嗰句，未到代入角色到拍完後仲鍾意。佢細細個就拍戲，應該叫佢唐寧姐，同佢friend嘅，佢性格似男仔，好易相處。」問黃宗澤，唐寧是不是他那杯茶？他抵死地說：「我飲齋啡，飛糖走奶，日日返公司買，唔使求人，自己沖。」