馬會主席夏佳理（圖）今年任期屆滿夠鐘落莊，夏佳理當年因不滿前律政司司長梁愛詩處理「虎報案」以公眾利益為由唔檢控胡仙，喺立法會辯論對詩姐不信任動議時憤而離席，之後唔選立法會離開政治舞台，不過退一步海闊天空，喺馬會一樣做得有聲有色。
熟識夏佳理嘅人都知做馬會主席係佢人生最大心願之一，如今心願已達，佢亦可以叠埋心水搵真銀，繼年前同民建聯方和等合組律師事務所後，佢更北上搵機會，聽日正式宣布同金杜律師事務所結為策略聯盟，一於人民幣同港紙一齊收。
夏佳理呢個新拍檔頗有來頭，成立超過二十年，係中國司法部最早批准設立嘅合夥律師事務所之一，律師樓有四百幾位律師同職員，喺北京、上海、深圳、成都、廣州以至美國矽谷都有辦事處，規模喺國內屬數一數二，更加係中國奧委會指定唯一向○八年北京奧運提供法律諮詢嘅中國律師事務所。
爆料熱線：29290000、27860099
報料傳真：26239278
報料電郵：[email protected]