行過中環街市位於域多利皇后街一段，經過三聯書局門口，一時心血來潮，走入去行吓。以前喜歡去書局打書釘，睇書睇到書局職員眼掘掘望住自己之時，先至識趣，急急腳鬆人。
現在因工作時間緊逼，經常趕頭趕命，不彈此調久矣，嗰日走入三聯之內，發覺多咗一層二字樓，專門賣「傳媒、出版研究」（MediaandPublishingStudies）嘅書，書種比較少有，其中大部份都係內地出版簡體字書。左丁山睇中文書，素來鍾意舊款，即繁體字直排，有得揀嘅話，一定唔買橫排簡體字版本，不過，望吓望吓，價錢差好遠噃，例如見到一本河北教育出版社出版嘅《媒體操縱》（譯本，原名JohnClare'sGuidetoMediaHandling，呢位JohnClare唔係十九世紀英國詩人，而係二十世紀英國記者），厚二百六十六頁，版面設計與印刷，同香港出版嘅書本比，毫無分別。價錢呢？只售二十九元八角，讀者只要鍾意內容，畀錢絕不會猶疑。
另有書架擺滿「傳媒人物」嘅書，赫然見到一本呂家明所寫嘅《黎智英傳說》（明報出版社，一九九七年八月第二版），呢本書初初出版之時，作者呂家明曾送來一本，後來不知所終，大概係俾老友借咗去，一借冇回頭。今次見到第二版，即刻買番一本。價錢呢？一百八十三頁，售六十三元，比《媒體操縱》貴好多噃，內地書與本港書嘅價格相差咁大，好令人擔心本港出版業難以生存。以前大陸書製作粗劣，現在已經追到本港水平，假如香港人習慣咗睇橫排簡體字版，冇咯、冇咯！
《黎智英傳說》一書內有肥佬黎年輕時候（未肥）嘅照片，睇落相當英偉，比黎明更加吸引，只是黎智英太過鍾意食，變成咗中年肥佬，否則黎明難以獨領風騷！