呢排無綫播緊嘅新劇《鐵血保鏢》都有班觀眾支持吓，飾演忠義鏢師嘅馬浚偉，喺螢幕上成日扮乖仔，原來私底下嘅佢非常蒲得，早幾日仲一拖三去街，食飯食咗三粒鐘，唱K就唱足五粒鐘，蒲到天光至捨得返歸，關仁真係估佢唔到！
歌癮大發
嗰晚馬仔親自揸住駕黑色富豪Jeep，同三名女士喺九龍城南海漁村歎消夜，當時已經有班中年女子到場開位等佢開飯，馬仔同班女人就極度好傾，由夜晚九點幾食到凌晨十二點幾，其間同行女伴亦相當好服侍，特登陪馬仔入咪錶。
忽然變臉
飯後馬仔載三位女士返佢何文田嘅屋企，泊車後，一行四人再坐的士出尖沙嘴安達中心唱K，當年以「他不是黎明」做唱片海報宣傳金句、歌手出身嘅馬仔，九成歌癮大發，竟然由凌晨一點唱到天光六點至捨得走。
當馬仔同三女一齊行出卡拉OK時，本來大家有講有笑，但佢發現關仁喺度時，突然擰歪面反方向走，仲同三位女士左右彈開，嗱嗱臨打的，上車之後，馬仔至擰轉頭怒目而視。其實唱K正常消遣啫，馬仔咁大反應，反而令人覺得佢古靈精怪。
