蘋果基金每年大大話話收千幾萬善款，我哋又點敢怠慢，數數手指，去年我哋撥畀社福機構搞服務嘅錢超過四百萬，共有七十一個計劃得以開展服務，加埋蘋果助學金每年使三幾百萬，仲未計我哋日日撥款嘅求助個案……
撥400萬資助71計劃
「我哋啲錢係嚟自蘋果日報讀者，我哋唔想話我哋啲錢多到使唔晒，但係我哋仍然想做多啲，歡迎機構多啲嚟申請錢。」蘋果日報慈善基金愛心基金委員會主席許賢發太平紳士日前喺蘋果基金簡介會上說。
一年一度嘅蘋果基金簡介會日前喺社聯禮堂舉行，除咗發叔到場支持，又點少得我哋另一位董事委員邱可珍太平紳士，今年嚟參加嘅機構代表超過一百三十人，佢哋大部份係前線社工，佢哋最關心當然係乜嘢計劃先可以攞到錢。
我哋特別安排咗三位機構同工現身說法，佢哋之前成功攞到資助，到底有乜秘訣？貼士就係——佢哋嘅服務對象專攻啲弱勢社群，包括：貧困學童、籠屋及板間房人士、貧窮老業主、失業人士、露宿者、更生人士、單親人士、低收入家庭等等。
我哋最高興聽到唔係佢哋對基金嘅掌聲，而係一眾弱勢社群，因為基金資助嘅計劃，生活得到改善，生命活出尊嚴。
多謝晒！各位有份捐錢嘅讀者！多謝晒！各位默默付出嘅社工！
暖流熱線
電話：29908688
傳真：23702192
電郵：[email protected]
網址： http://www.charity.atnext.com