日本超級爵士錄音品牌Venus的字典裏，好像從沒旺淡季之分，每個月無間斷地推出封面設計高雅具品味、音樂易入耳兼錄音具水準嘅爵士專輯。更令人佩服係這個Label人強馬壯，即使推出雜錦碟亦一樣架勢堂過人，如果閣下喺唱片舖見到此碟的演出陣容，13首爵士名曲竟由13隊來自歐美各地的鋼琴三重奏組合所演繹，是否經已有一買的衝動呢？
其實除了這張《TheStandard》，Venus同一時間還推出另一張同樣具份量的《TheBallad》，前者走輕快路線而後者以冧到入心的旋律為主。雖然話人搖福薄，但我一邊聽《TheStandard》，真係忍唔住全程跟住音樂周身郁、腳印印，單係一首長達六分半鐘的《KillingMeSoftlyWithHisSong》，編曲之精采已夠技驚四座、值回碟價。何況每隊組合的三件樂器無論音色與質感皆達示範級水平，爵士樂迷或音響發燒友非捧場不可了。
文：李廸偉（hk.myblog.yahoo.com/reviewcd）