謝賢（四哥）千金謝婷婷舊年由加拿大返港放暑假，搞到天翻地覆，晚晚鬼咁性感拖仔夜蒲兼食煙劈酒，仲俾人影到着超少布比堅尼曬太陽嘅艷照，連佢阿哥謝霆鋒都頂佢唔順，猛叫傳媒跟佢細妹，話最好有幾衰寫幾衰，等佢咪以為做公眾人物好過癮，早日返加拿大讀多兩年書好過。
拉姑攬中坑
不過，日前婷婷秘密返港，呢次佢轉性做乖乖女，撇甩混血男友JayAlexanda，同爹哋媽咪及阿哥，一家四口享受天倫樂。
嗰晚四哥、拉姑、婷婷同成班親友去咗灣仔富豪飯堂福臨門酒家食晚飯，拉姑十點幾同一男一女友人步出酒家，仲同位男士嚟個親密擁抱，拉姑送咗佢哋上車離開後就返入食肆。隔咗一個鐘頭，四哥、拉姑同婷婷就同幾位親友一齊離開。
現場見婷婷好似甩晒色咁，冇晒艷光，冇化妝亦冇DeepV性感裝束，戴住墨鏡嘅佢打扮隨意，好乖咁跟住爹哋媽咪上車，直接去咗霆鋒馬己仙峽道嘅屋企，逗留到凌晨兩點幾都未見佢哋走，唔知霆鋒今次會唔會趕細妹快啲返加拿大呢？
Textby關仁
