「倒曾」潮由香港捲到北京，喺阿爺眼皮底下，左派通通收口唔再放肆，一直瞓身挺曾嘅賭王何鴻燊一錘定音話「倒曾」、「發夢冇咁早」，賭王此言一出，相信煲呔即時放下心頭大石，開記者會時笑到見牙唔見眼，一於當左派無到，事關賭王搭通中南海天地線，唔會收錯風嘅。
有行家同八方報料，原來當日賭王並唔係第一時間開口挺曾，有記者問賭王點睇「倒曾」問題，佢聽唔清楚以為講緊「賭爭」賭權之爭，澳門已經開放賭權，外資同地頭蟲各有各搵食，生意做得和和氣氣，重有乜「賭爭」可言呢？因此賭王無答問題就走咗，據聞之後有人提佢話記者想問「倒曾」，佢先恍然大悟，轉頭即刻同記者大講「倒曾」陣營嘅發夢論，賭王係政協常委，身為國家級領導人，講到出口梗係無人敢駁嘴，相信左派聽完都幾無癮。
爆料熱線：29290000、27860099
報料傳真：26239278
報料電郵：[email protected]