一提起凌波，相信年過四十者絕不感陌生。凌波十來歲時被賣給人家做養女，年紀小小便要謀生。到六三年，她憑黃梅調電影《梁山伯與祝英台》反串演梁山伯一炮而紅，身價暴升，邵氏掌舵人邵逸夫為顧及其形象，竟一把火將拍好的電影《紅娘》燒成灰燼，不許她的女裝扮相曝光，其氣魄令凌波折服。 撰文：戴彩煥
六十年代，凌波反串演出黃梅調電影《梁山伯與祝英台》一炮而紅，成為邵氏兄弟電影公司掌權人邵逸夫（六叔）的頭號愛將。台北更因她而變為狂人城，十五萬人一度湧到街上，為的只是想見梁兄哥的廬山真貌。據凌波透露，當年六叔為力捧她，不想她的女裝扮相曝光，竟一把火將已拍好的電影《紅娘》燒毀，教凌波佩服得五體投地。
凌波憶述說：「我初入邵氏嘅時候，曾經拍過一部《紅娘》，演小姐崔鶯鶯，部戲未上，我反串演梁山伯紅咗，邵先生擔心班影迷接受唔到我做番女仔，所以一把火燒咗部《紅娘》，佢呢種氣魄真係令人好佩服。」
傳林黛拒絕合作
台前幕後工作人員的努力耕耘，一下子變成灰燼，凌波豈非變成罪魁禍首，招人怨妒？凌波笑道：「我諗都會有嘅！正如當年我紅咗之後，邵氏開拍《寶蓮燈》，想搵我做林黛個仔沉香，但聽聞林黛知道後即刻同公司講，話要自己演兩個角色，應該係唔想我做啩。」
初拍廈門片時，凌波片酬每部五十港元，入邵氏後，月入六百，走紅後更由六百變千六，何止升價十倍。對於邵逸夫的悉心栽培，凌波尤是感激，只是她跟金漢相戀結婚，令賓主關係起變化。凌波笑說：「以前拍戲嘅，梗係唔想啲演員咁早結婚啦！」
家貧被賣當養女
凌波的童年歲月，就跟張活游和白燕主演的粵語片劇情一樣坎坷：十多歲時因家貧被賣給人家當養女，從此與家人失去聯絡，直至五十多年後，她才與弟弟團聚。
凌波說：「一直以嚟好多人認親認戚，早幾年阿肥（沈殿霞）喺內地做嘢，有人同阿肥講話佢係我細佬，阿肥話對方同我好似樣，我都不以為意，後來細佬個仔移民去多倫多，喺網上尋親，台灣班影迷睇到話畀胡錦聽，我確認啲資料之後，終於喺○五年一月二十五日喺深圳同細佬見番面。我真名原來叫黃裕君，細佬叫黃裕生，我養父一直好同情我嘅身世，不時同我家人通信，話我嘅近況畀佢哋知，嗰次我見番細佬，佢仲攞番養父寫嘅信畀我睇，我認得養父筆迹，知道呢個真係我細佬。」
部份相片提供：凌波、陳永業
