前日工商科技局正式展開兩局（即係電訊管理局同埋廣播事務管理局）合併嘅諮詢，唔知係咪因為分階段合併令到份文件太「齋」，所以焦點就去番究竟邊個會係合併後嘅通訊局（CA）呢個超級監管機構嘅話事人。
而廣管局同電管局話事人馮華健同區文浩（MH），就好理所當然咁成為「必然候選人」，咁官府𠵱家當然係話未搵到人做啦，但查實官場路邊社消息人士同八方講，MH明年退休所以係肯定唔do，而馮公子呢，就一定無份咁話！
點解馮公子無份？權威人士話，官府係要搵個真真正正識得電訊同廣播、同埋要瞓身全職嘅人去睇晒呢兩瓣。咁廣管局好話唔好聽，真係有幾多嘢管，大家心中有數，再者每個禮拜六係咁意開吓會，講埋啲都係無關痛癢的問題。
馮公子出名爛蒲
而俾人影到得閒都會去老蘭「夜蒲」嘅馮公子，仲要成日蒲頭，再者，佢話晒都係律師，應該志不在睇啲咩通訊同埋廣播。簡單啲講，官府認為佢唔得閒所以無預佢，睇嚟，馮公子如果做唔成律政司又唔使去CA，日後佢應該可以有更多時間去老蘭做其識法女殺手！
咁官府究竟有無心水人選呢？查實係有，其中一個大熱係𠵱家MH個副手、即係電管局第二把交椅傅小慧，皆因小慧姐對電訊同廣播兩瓣，都熟到開巷，同啲業界「拗數」又掂，加埋又後生，有排唔使諗接班人同第二梯隊問題。
不過，權威人士話，咁唔代表佢一定會跑出，因為官府呢期又興番玩「崇洋」，睇睇隔籬負責搞衞生個「一條鱷魚」，最近都響袋鼠國搵個洋人返嚟，呢個就係一個好好嘅「先兆」，所以，小慧姐個「底」就算幾厚都唔一定撼贏啲紅鬚綠眼㗎！
爆料熱線：29290000、27860099
報料傳真：26239278
報料電郵：[email protected]