一套《拳霸》，打紅咗TonyJaa！再下一城拍《冬蔭功》，可惜香港上畫時口碑麻麻，筆者亦因此冇喺戲院睇此片；日前其DVD終於上市，可能已經消化晒「路邊社」專業影評，今次以輕鬆心情睇DVD版《冬》，感覺仍然拳拳到肉，一腳將人踢飛、一拳斷手折頸，仍然是狠打的TonyJaa！
記者、攝影：朱崇德
碟迷們感覺呢排新片相當不濟，加上近期好多舊片翻出，甚麼《蕩寇誌》、《綠野仙蹤》，好多老戲迷真係買到唔停得手！不過更大嘅「災難」今個星期再發生！美高梅好多經典舊DVD，竟然劃一割價促銷，據知街價大概「割」緊$49單碟、$69雙碟，真係買到手軟！
遠赴澳洲救大象
故事大綱同《拳霸》有幾分似，都係大鄉里出城的故事；話說TonyJaa飾的阿錦出身泰國武學世家，老父是一名窮鄉避世的前御前侍衞；據泰國人的傳統，戰事中是以泰王的象騎戰為首，錦的老父就是保護御象的衞兵，所以自小就習得不退半步、招招奪命的戰狂式武功！村長竟連結黑幫，企圖將阿錦家中大象以黑市渠道賣往澳洲；阿錦為奪回心愛大象，隻身犯險遠赴澳洲挑戰黑幫頭子！
除導演及編劇同樣出自柏治也平寇外，故事都係好地道的泰國風味。可能受《拳》在世界賣埠所累，儘管Tony今次仍然招招狠打，但刻意打鬼佬、跳跳扎扮成龍左閃右避，同澳洲實地取景、荷李活式大製作，反而令人有種過份賣弄的感覺，對比《拳》難免有被比下去之感！
惡戰40嘍囉
雖然今次《冬》並冇好以一字馬過貨車底、飛身過玻璃呢類精采鏡頭，不過表現TonyJaa功夫身價的地方仍然頗多，筆者認為全劇的高潮打鬥位，是中段的隻身搗破大淫窟，精采處是一氣呵成4分鐘冇斷位，好似《死亡遊戲》般打上一層層的高樓，惡戰上近40個小嘍囉，一腳穿心、斷手斷腳，甚至一嘢掟落街，真係狠打非常，更難之處是以菲林機拍攝，最長的菲林長度亦剛好只能拍4分鐘，所以時間掌握及武打編排都可以話準確到極致，據知以TonyJaa鐵打的武功根底，一日都只可以早、晚拍兩次這組鏡頭，每次都係打到虛脫冇力，真係唔講得笑！
其他必睇位還有決戰中國單刀王，及有如跳森巴舞的中美洲拳法，不過如果話最失敗者，就係對X-Game街童一段，TonyJaa左跳右閃、穿欄過隙喪避街童圍毆，感覺係「拳霸」無端變「Out霸」成龍嘅玩馬騮戲，令電影真實感大打折扣！加上尾段決戰《木馬屠城》巨人──尼芬鍾斯，感覺是反不如前幾段的武打精采，簡直係反高潮位！不過幸好還有30幾個有如AgentSmith的黑色西裝黑社會頭目，同TonyJaa對打，全部使出有如擒拿手的招式，乾脆利落一招斷手裂腳，雖然打得快，但招式簡單直接，喜歡武功者，真係學到唔少嘢！
假扮親戚媾伴娘
人哋結婚擺酒，三九唔識七博大霧，上去食飯飲酒又打麻雀嘅「冒牌親戚」事件，香港都時有發生！不過在《冒牌伴郎生擒姊妹團》中，奧雲韋遜同雲斯漢呢對活寶就唔止飲飲食食咁簡單，佢哋嘅嗜好係喺人哋婚宴上搞破壞，無論係猶太式、意大利式、中國式、愛爾蘭式，甚至印度式的婚宴，都可照玩！除咗唔使錢大吃大喝同出風頭外，最重要還是偷盡伴娘心！不過二人一直嚴格遵守一套「婚宴守則」，就係玩吓算，唔可太認真！
結婚旺季進入尾聲，極具勢力的財政部長亦嫁女在即，他們雙雙被新娘及伴娘吸引，無法自拔，於是嘗試混入華府，破壞婚禮。二人扭盡六壬，終成功混入這次冠蓋雲集的盛事，約翰在無計可施之下決定打破守則，誓要奪得美人歸，但卻釀成了一場搞笑的大災難！
經典DVD喪劈$49
由細睇到大，電影開畫前的「吼」一聲可能成為絕唱，因為SONY已經買下了美高梅，加上好多代理發行的電影版權亦差不多到期，所以最近佢啲倉底勁片全部攞晒出嚟喪劈！
店長推介猛片
未來戰士
阿諾響朵之作，當年風頭真係勁似今日《22世紀殺人網絡》，不過「美」只出了第一集！
浪人
槍戰同飛車片中經典，𠵱家好多同類片都可以話跳唔出佢呢個框框，而槍戰場面超正，家中試機碟點可以冇。
4個婚禮1個葬禮
曉格蘭特勁冧之作，並以此片奠定其愛情小生地位，而且以婚禮為主題，女士們最歡迎。
鐵甲威龍
以B級製作成全球賣座電影，絕對係真功夫之作，以後推出過2、3及動畫卡通，但都唔及第一集原汁原味。
沉默的羔羊
筆者個人至愛！好多人都係睇此片而愛上犯罪心理、變態心理學電影！故事情節超緊湊，真係睇到有透不過氣的感覺。
新鐵金剛之不日殺機
美高梅其實代理了十多隻鐵金剛全系列電影，亦係現時最多人想搵齊全套的Target碟！