鄭希怡（Yumiko）：「夏天嚟緊，我鍾意揀雪紡質料嘅裙，畀人一種飄逸同浪漫嘅感覺。不過着雪紡衫切記事前一定要熨，同埋唔適宜掛，因為好易掛到件衫走樣。選擇連身裙最緊要係啱身，好似我今日條裙着出嚟嘅效果，我覺得會slim啲，唔好以為本身有少少肥，着條鬆身裙遮醜，咁樣反而會弄巧反拙。」
Fiona東瀛珠女
薛凱琪（Fiona）：「我揀衫會以淡色為主，唔會買太誇張同太彩色嘅衫。我好鍾意飾物，因為飾物可以配襯牛仔褲同外套，每逢出外工作同行街，一見到靚同得意嘅飾物就會買。
我到𠵱家有近三百件珍藏，最鍾意就係平面或者立體嘅圓形圖案飾物。」
周麗淇瘦人冷裙
周麗淇說：「呢條裙下身係傘形，我上身薄同瘦就可以着到呢條冷裙，如果下截貼身就唔好睇，同埋傘裙睇落young啲。我亦好鍾意蝴蝶，當見到件衫、鞋、飾物有蝴蝶，我都會望多幾眼，可能平時我唔夠斯文，如果襯啲蝴蝶，會女仔啲。」
李彩華Dior狂迷
李彩華（Rain）：「手袋最能夠突出衣着，呢個限量版Dior手袋全港只得十個，熟客先至買到，手袋上面嘅蝴蝶係人手畫上去，呢隻色仲要係我最鍾意嘅粉紅色。我每個月都會買一個手袋獎勵自己，我定期一個月喺Dior買一個手袋，好快就可以成為佢哋VIP嘞！」
採訪：馬建華、楊潔雯、張俊銘
攝影：葉君海、仇志德
