打牌，打無限番或番數大者，通常都係半辣半辣上。
光大控股（165，光控）則好大機會「半蚊半蚊上」，即係每隔1段時間，跳升5毫，而且會跳幾次，可能跳夠４次。
光控揸光大銀行（光銀）21.39%。光銀04年度蝕大本，光控喺光銀嘅投資，已撇賬至零。光銀密鑼緊鼓搞上市，一旦成事，光控分佔幾多，就增值幾多，好肥。
光銀係大嘢
光銀係大嘢，05年中總資產高達4534億元，在全中國嘅銀行中排名第10大。已經有消息話中央滙金會注資100億元入光大集團（光控大股東，揸光控55.41%），重組光銀，將不良資產賣畀信達資產管理，又有消息話渣打（2888）會注資入光銀。一般估計，光銀重組後，市值可能高達500億元，呢個數字，係按光銀P/B2.5倍計。建設銀行（939）與交通銀行（3328）現時P/B已超過3倍，光銀按2.5倍計，並冇離譜。
假設光控喺光銀嘅持股量，因改組由21.39%攤薄到10%，身家亦會因光銀上市而膨脹50億元。
光控發行股本15.65億股，股價每升半蚊，代表7.8億元，唔夠8億元。光銀上市令光控得益嘅50億元，代表4個「半蚊」，所以話股價有權由4.15元升上4.65元、然後到5.15元、5.65元、6.15元。
光控另外嘅好消息，係檔證券生意好掂，光控揸光大證券（光證）46.4%。今年1月18日，內地網站漏料，話光證05年度盈利大增1.1倍，光控股價即時彈升7.1%，搞到光控要發聲明解畫。仲有，光證已獲批准上市，第日值幾十億元甚至過百億元，光控又係肥過肥仔。
光控現時市值不過65億元，光銀與光證對光控嘅得益，講緊都係數以十億元計，光控真係禾稈冚珍珠。
6字頭冇走雞
光控市值上到100億元，股價見6.35元。前便講光銀上市令光控股價上升到嘅水平，係6.15元。光控賬面NAV3.1元，以唔算偏高嘅P/B2倍計，值6.20元。
3條數計落，光控都係值6字頭。光控睇6蚊，冇走雞。
今期推介副選，係光大系另1隻比較細粒嘅光大國際（257，光國），市值不過13.78億元，減咗大股東光大集團所揸嘅68.92%，街貨只有4.28億元，好易做嘢。
炒埋光國
光國轉型，去年由基建與物業投資轉到內地環保，有國務院支持，開步順利，進展甚佳，將來有機會做行內阿1阿2，脫胎換骨。
內地志切推行生態建設與環保「十五規劃」，內地環保市場營業額每年2000億元，90%以上由小型公司經營，光國每年爭取2%，1年營業額就已經40億元，保守回報10%，即可賺4億元，每股盈利0.157元，現價0.54元，PE僅3.4倍。
光國NAV0.44元，P/B1.2倍，相對如中國水務（855）嘅7.0倍與天津環保（1065）嘅1.4倍，屬於落後。以P/B2倍計，光國可見0.88元，有機會升63%。
咪當FollowMe副選係次貨。上周提供嘅副選南粵物流（3399），1周升幅9.3%。前周提供嘅副選中化香港（297），兩周升幅33%，仲厲害。
光大系1對孖寶光控與光國，正選副選，齊齊炒，齊齊搵銀。
高彰坡