力寶華潤（156）上月抽穿1年阻力軌，盤整期間，扶搖直上前，力華瓣瓣有概念，係埋位出擊時候。力華NAV0.56元，現價（0.183元）折讓67%，呢期資金埋牙細價折讓股，力華掂。
再講，力華單喺祖國上海力寶廣場（34萬平方呎）一幢物業，係咁意秤5000蚊一方呎，已經等於集團本身市值，祖國其餘36萬方呎商場物業、160萬方呎發展中物業，仲未計數兼重秤，進而論證力華價殘之餘，亦睇到力華祖國物業唔嘢少，開ChinaConcept，又掂。又呢期外電報道，大股東李文正家族計劃喺星洲設立REIT，當中包括香港上市公司物業。消息意味力華可能有資產整合，有noise之餘，資產重秤有價。估計力華亞洲區資產重秤後，NAV起碼值0.7元，現價翻一番，見0.366元，較秤後NAV仲有48%折讓，力華實情大把水位。
百利保貨源入強手
百利保（617）上星期玩震倉，周中約略質穿上升軌，上星期五又抽番上近一個月高位收市。又講兩點：第一、1月尾2月頭，不時見到美資大牌密密入貨，連埋上星期震倉，估計貨源應該落入強者手。第二、百利保NAV0.56元，現價（0.224元）折讓60%，屬世城系內折讓最大嘅股份。無得傾，要搞，揀百利保。呢期細價股中，麗展（488）炒到同NAV睇齊，百利保只求折讓50%埋單，已代表現價升幅20%。
錢雋