○三年無綫播映《衝上雲霄》時，劇中飾演見習飛機師之一的黃宗澤嶄露頭角，但隨之而來連串負面新聞迎頭痛擊，又把他打下地獄，到去年推出由他主演的《我的野蠻奶奶》才扭轉局面，有拍檔胡杏兒緋聞助威，加上背後傳有高人契媽及女高層做靠山，三個女人內外夾攻，終讓他谷底反彈。 撰文：朱倬誼
事業篇：借星運七年？
過去一年，翡翠台晚上的合家歡時段曾先後播出多部黃宗澤主演的劇集，幾乎晚晚陪住家庭觀眾開飯，雖然如此，但其星運仍是大起大落。去年二月播映《我師傅係黃飛鴻》時，最高收視逾二百萬觀眾捧場，可惜紅劇不紅人，他在劇中飾演俠義化身的黃師傅，說服力奇低，皆因其負面新聞太多，包括被前女友數他食軟飯、交損友，又在夜店生事被爆樽穿頭。直至同年六月，一齣收視高企的劇集《我的野蠻奶奶》，令飾演「不留名」的他鹹魚翻生，名、利、人氣和機會，甚至台慶飛躍進步獎，統統返回來。
靠實力自強
反彈理由除了黃宗澤勤力襟撈外，背後兩個女人，亦與他有玄妙關係，其中一位是其契媽，是圈外人，有傳她擅長借運，楊千嬅和鄭伊健亦跟她關係密切，契仔黃宗澤大半年時來運到，傳聞是因為借了七年運。
日前黃宗澤在尖沙嘴接受訪問，關於有位高人契媽，他一開始就承認了：「佢的確係我契媽，同我媽咪係好朋友，我讀中四、五時，同佢正式上契。呢行有好多人知我哋嘅關係，但好坦白講，我冇借運，算吓其他嘢、問吓，都冇。佢明白啲人知我係佢契仔，驚被人講話我借運，所以唔主張，佢仲同我講笑話：『你紅咗唔好嚟搵我呀，費事俾人話你借運。』
「我嘅觀念係有借必有還，借咗運，你日日坐喺屋企唔做嘢，係咪都會發達呀？我寧願靠自己實力，唔希望第時成功咗，啲人話佢借運呀嘛。」
嫲嫲樂易玲
另一個女人，是無綫高層樂易玲，有傳黃宗澤是她愛將，有她關照，所以備受力捧，就算負面新聞成籮時，劇集亦未停過。
「公司當我哋咁多個好似仔咁錫，阿媽唔想睇住個仔衰㗎，我同樂小姐嘅關係，係上司同下屬，用家庭觀念睇，經理人Tina係阿媽，樂小姐係嫲嫲，佢對個個都咁好，林峯、陳豪同林保怡，一樣多嘢拍㗎。」
有報道指黃宗澤為樂易玲揼骨獻殷勤，所以得寵。重提舊事，他卻輕描淡寫：「揼骨事件，搞笑。樂小姐呢位嫲嫲，德高望重，邊度咁夠膽掂佢呀？邊個夠膽掂佢膊頭？」
黃宗澤背後有靠山，但曾幾何時，他亦確有捱過，雖未到扮死屍，但屬二打六中堅，暴風少年死花𡃁角色，一定有份。
回想當年捱騾仔日子，黃宗澤說得倒輕鬆：「由低到高，呢段時間好講機緣巧合，除咗自己幸運外，又好多謝公司錫我，經理人同監製都畀機會我。有段時間，我好灰，但冇理由遇灰暗就死吓死吓咁死咗去，應該更加努力做事。
「我啱啱入行時，有段時間係乾𢭃公司人工，頭一年做園丁甲、書生乙，嗰時以為一入嚟就拍劇拍到死，一入行就係古天樂。當時抱好大希望，但失望就愈大，仲懷疑自己係咪適宜做呢行？唔夠靚仔？會唔會做唔到戲？
拍劇學做人
「到做咗一年鬆啲，開始做主持，入呢行個個都想紅，做主持都有諗過點解冇劇拍，係咪我係主持材料而唔係拍劇材料？既然係咁，把心一橫啦，做第二個鄧梓峰。點知後來吔吔烏拍到《衝上雲霄》，突然間嘩一聲，嗰時睇鎮宇、陳慧珊做戲，至知演戲係好玄妙嘅事。」
上完「雲宵」後，一連串負面新聞把剛上位的他打落地獄，黃宗澤說他當時未去到「玩完」的黯淡心情，但感覺固然不妙：「四個字形容嗰時心情啦，不知所措。又驚又騰又唔知做乜，但當時公司畀咗支強心針我─加簽合約，公司重會用我做嘢，所以至要更畀心機。」
攝影：仇志德
服裝：www.izzue.com
場地：LaBrasserie@TheMarcoPoloGateway
