息影後的鍾楚紅，沒有只顧享受少奶奶生活，而是投身環保為保護地球出一分力，當各偶像仍在追逐台下的歡呼聲時，紅姑已到過中國西北的山區，教小孩保護地球，令她換來「鍾老師」的稱號。由大明星到鍾老師，紅姑謂老師身份令她更感動。
鍾楚紅投身環保事業已十三個年頭。當一班闊太、名人在金鐘太古廣場COVA享受下午茶的同時，不遠處的花園道上，紅姑正戴着一個兩元的口罩，在路旁記錄着排放過量黑煙的汽車，然後交給運輸署跟進。
到屋邨換慳電膽
紅姑意識環保的重要，由當年出外景開始，「每次去到外景場地，大自然景色好靚，令你好感動，可惜每次收工都會發現成地都係我哋啲飯盒，我哋又將啲樹劈落嚟做效果，搞到環境好不堪。我諗點解我哋人類可以咁自私！」就是這份感覺，令紅姑覺得要為大自然做點事，所以當「地球之友」十三年前邀請她任環保大使時，紅姑二話不說一口答應，唯一條件就是不要將她當成巨星看待。
除身體力行在家居種花、種香草回饋大自然外，紅姑又到各屋邨為住戶換慳電膽，巨星搖身一變成為電器師傅。然而環保的速度始終不及破壞來得快，每次看到內地新聞都令紅姑慨歎不已，「好多企業為咗經濟發展，就犧牲咗環境保育，重金屬污水排入江河，農地綠化地就變晒高爾夫球場，排廢氣嘅煙囱愈嚟愈多，睇見真係好心傷。其實地球你同我都有份，污染咗啲土地，最後受害嘅咪又係自己，只怪啲人目光短淺，只顧眼前利益。」
因此，紅姑跟「地球之友」赴內地偏遠山區，教導當地婦女及兒童保護地球的重要，「公德心係要培養，最好由兒童開始，等佢哋知道大地係大家共有嘅財產，要大家愛護。」雖然山路崎嶇，但無阻紅姑的決心，開班授徒，她回想說：「每日同班天真無邪嘅細路仔上堂，雖然自己啲國語麻麻，但聽見佢哋叫我一聲鍾老師，覺得乜都係值得，不枉此行！」
拍戲悲喜參半
紅姑回想當年拍戲時前呼後擁，但感覺仍不及現在充實，「拍戲帶畀我好多嘢，有得有失，亦有開心同唔開心。但投身環保事業，因為大家理念相同，所以只有開心，呢份係我退休後嘅第一份事業。」至於會否拉攏圈中好友如周潤發及張曼玉等幫手，紅姑則有保留，「環保要自己親身體會，我唔會主動搵佢哋幫手。至於我先生（朱家鼎）仲投入過我！」
後記：陰天忽放晴
訪問當日早上天氣陰霾不定，灰濛濛一片，不過「天道無親，常與善人」，當紅姑抵達山頂前半個多小時，天空忽然放晴，藍天白雲，紅姑亦不期然說：「好靚，好耐冇見過咁翠綠嘅景色！」就當是地球先生回饋這位綠色戰士吧！
協力：陳月媚
攝影：陳偉權
場地提供：ThePeakOutlook
部份圖片提供：地球之友
