面對小小超檔now不斷強攻，最頭痕者莫過於九倉有線「K寶」。查實因應市場轉變，今年1月1日起，K寶已經實施台網分家，咁未來又會點做呢？話事人吳天海（圖）響港台「與CEO對話」嘅節目透露咗少少玄機！
佢話，K寶啲內容主要得一個客仔，就係有線自己個網，佢希望可以陸續將內容賣畀其他網。佢舉例講，K寶體育台只係賣畀K寶個網，如果價錢同條件合適，可以向香港所有平台，提供體育資訊。佢仲話，假如有個平台出到好條件，成個體育台賣畀佢都得！咁唔知海哥𠵱家有無同咩平台傾緊呢？
海哥又講到佢兩位老細──已故船王包玉剛同埋駙馬爺吳光正，佢話包SIR眼光十分遠大與眾不同，能夠睇到人哋睇唔到嘅嘢，而且敢於唔跟潮流，好似當年包sir做咗船王，喺行業最興旺大家係咁買船之時，佢老人家居然預見風暴將至，不停賣船，賣到連啲同事都驚。最後，當然係眼光獨到，成功響風浪之中轉型登陸。駙馬爺呢？海哥話，響佢身上學到好多，其中一樣係堅持，佢話駙馬爺如果覺得一樣投資係值得，就會堅持到底。
爆料熱線：29290000、27860099
報料傳真：26239278
報料電郵：[email protected]