馬主Ｎ搞慶功宴，馬房、馬主，及馬主Ｎ嘅友好，冚扮爛到場，馬主Ｎ做馬主以來，最威水就係今季，隻馬好似係佢嘅ATM，逢出賽都有獎金，重為佢奪得六十五萬元特別獎，真係抵馬主Ｎ牙擦，做人要講行運，馬主Ｎ今個馬季嘅運氣，好到不可思議。
左丁山都有啲小運。慶功宴自然有抽獎助興，呢晚練馬師徐雨石中獎，騎師蘇銘倫中獎，評馬人逸東中兩次獎，馬房工作人員中獎，可說皆大歡喜，抽到最後兩個，一獎、二獎之時，左丁山成枱人都未領過獎，諗住今晚冇運嘞。左丁山望住張抽獎券，係六十二號，坐在身旁（左手邊）嘅大編輯話：「六十二號係我嘅，你右手邊嗰張六十九號先至係你嘅。」於是揸住張六十九號，右手邊嘅關龍就順手攞張七十一號。唉吔吔，馬主Ｎ太太上台抽獎，第二獎係六十九號，然後第一獎就係七十一號。世事竟有如此巧合者！獎品係名貴手錶，牌子相同，左丁山抽中女裝錶，關龍抽中男裝錶，急忙問人：「隻錶值幾多錢，我要向上級申報！」大家都唔知，橫睇掂睇都似超過一千蚊，我倆互相恭喜，大編輯就呻到樹葉都落埋。
抽獎講運氣，蘇銘倫就憑功夫帶來運氣，睇佢騎「勝利飛駒」與「威猛情人」，唔到你唔服。呢晚與佢近距離接觸，發覺佢實在靚仔兼迷人，佢身高五呎六吋以上，與不足五呎高嘅萬成（標準騎師身材）企埋一齊，相映成趣。馬主Ｎ位秘書見到蘇銘倫，暈咗十幾秒，猛話：「蘇銘倫乜咁靚㗎。」於是撲埋去要影相，其他人重唔跟風咩，於是蘇銘倫做咗佈景板。蘇銘倫騎完星期六（三月四日）場賽事，就飛返法國，佢嘅老闆阿加汗（AgaKhan）係昔年告東尼嘅老闆，現有馬匹三百五十隻。散布英格蘭、愛爾蘭、意大利、法國，主任騎師水皮啲，都會俾佢立即炒魷。香港小小地方，能夠吸引世界頂級騎師如蘇銘倫來港獻藝，可見我哋嘅馬場係世界一流。