由《星島日報》老細何柱國睇場嘅智經基金正積極吸水準備開檔，政界人士對呢檔嘢持觀望態度，事關有辦你睇，回歸前成立嘅明天更好基金、一國兩制研究中心等網羅全港大孖沙泵水嘅「智囊」，今時今日都處於冬眠狀態，身在美國嘅明天更好基金行政總裁袁金浩則強調，基金同其他智囊唔同，主要係向外推介香港，做一啲宏觀經濟研究，今年有大把嘢做，月中就會由執行委員會主席、恒隆集團大老闆陳啟宗帶隊去印度發掘商機，年中就會請埋前律政司司長梁愛詩一齊訪問美國，詩姐梗係會唱好香港回歸後法治無損啦。
對於新成立嘅智經，袁金浩話難以比較，但指明天更好基金歷史悠久，同國內領導人及各個機構建立咗良好關係，呢方面優勢未必人人都有。
傳真︰2623-9278
電郵︰[email protected]