昨日玖龍紙業（2689）首日掛牌，果然不負眾望，收4.75元，比起招股價3.40元，高出39.7％。雖然人人都分得唔多，但每手都賺過千銀，其實都幾和味。當然，如果有人借重孖展去抽，分得唔多之餘仲要畀重利息，就肯定唔多開心。
至於昨日先至跟進買入的投資者，相信暫時仍未有甜頭。經紀黃話，有芬佬計過條數，以玖龍昨日收市價計，預測PE大約16倍，如果玖龍繼續高增長，股價仍有上升空間。
另外，日前經紀陳提過中盈控股（766）炒高，好大機會趁股價高企配股，但估唔到中盈噚日咁快就出通告話正與一獨立第三者商討配股。經紀陳話，據講配股一事進行得好順利，而接貨者亦正如通告所講，係有來頭的大隻佬，而唔係通街派。
中盈昨日最高見1.38元，收1.34元，微升唔夠1％，成交股數4417萬股，金額5952萬元。
慕容小初