近幾個月嚟成日傳出袁詠儀（靚靚）有咗BB，噚日又有雜誌話靚靚同男友張智霖去超級市場買高鈣奶補胎，仲話佢懷孕五個月，肚大如西瓜兼面容浮腫。
健步如飛
靚靚噚日飛去上海拍廣告，佢着住Y3運動衫，手推LV喼同Hermes手袋現身機場，健步如飛。靚靚笑晒口咁同馮仁昭講，話張智霖睇完報道後話最緊要澄清佢嘅酬勞唔係得三萬蚊一集就得喇。
成日俾人話大肚，靚靚話屋企人同朋友都懷疑，傳媒嘅壓力仲大過父母。靚靚一邊笑一邊拍肚皮話：「若果我有五個月，過多幾個月咪生得？嗰日我去超級市場冇攞袋，銀包同電話放喺衫袋度，咁就話五個月。」
影響飯碗
至於有傳佢哋喺澳洲註冊，靚靚話好耐冇去澳洲，佢𠵱家事業心好重，暫時未有計劃結婚生仔。靚靚話要澄清呢件事，係因為覺得報道會影響佢未來嘅工作，所以同經理人考慮喺內地發聲明澄清。
靚靚近幾個月因為唔想太勞碌，所以每個月只工作十日，不過佢𠵱家主動同經理人要求拍劇，免得被指放假養胎。此外，陳冠希噚日同助手飛去日本拍戲，對於有報道話佢媾鬼妹，陳冠希話慣咗冇所謂。
